איינס האט געשריבן:סענס מאכט גארנישט
ווי אזוי יונגעלייט צאלן רענט מאכט דען יא סענס?
ווי אזוי מיטליעריגע צאלן די קעמפס פאר זייער 8 9 קינדער מאכט יא סענס?
למעשה רוב מענטשן דרייען געלט איינער מער איינער וויניגער, איינער אויף א מסודרדיגע אופן (ריפיינעסן זיין הויז, לייף אינשורנס) און איינער אויף ווייניגער מסודרדיגן אופן.
איין זאך איז אבער זיכער
ביים סוף מאכט עני וועי גארנישט סענס, אויך דער וואס האט לייף אינשורנס אויך דער וואס לייגט אוועק, סאיז אלעס גוט פאר איין צוויי קינדער, וואס טוט ער ביים דריטן און פערטן.
סוף דבר הכל נשמע מאן דיהיב חיה יהיב מזוני
ס'וואלט געווען זייער אומ'תורה'דיג, געמיין, און פארשעמענד צו ניצן בטחון אינעם אויבערשטן אלס א געצייג צו קענען טון זינלאזע זאכן און נישט דארפן זיך אפשטעלן א מינוט ניצן דעם של ראש.
דער היימישער לעבנסשטייגער איז שפענדעריש אויף אן אומפראפארציאנאלן פארנעם, אנגעהויבן פון וואוינען אין טייערע געגנטן, אויסשטאפירן צען קינדער יעדן סעזאן, שיקן ניין וואכן אין קעמפ, און געענדיגט ביי די צודרייטע חתונה סטאנדארטן.
בטחון? אזוי גאר! ווען ס'קומט צו לעבן מיט א בודזשעט און טון נארמאלע זאכן וואס די תורה לאזט טון, דעמאלטס שלעפט מען ארויס דעם בטחון געצייג. אבער ווען ס'קומט צו האנדלען ערליך און נישט בא'גנב'ענען אנדערע, פארגעסט מען אז ס'איז דא א גא-ט וואס שפייזט און ער לאזט דאס נישט טון.
הערט א מעשה: מיט א צייט צוריק בין איך געזיצן מיט מיינעם א באקאנטן וועלכער האט געהאלטן פאר'ן חתונה מאכן. יענער האט געהאלטן אין איין ארומרעדן ווי דער אויבערשטער שיקט אים צו וויפיל ער דארף, כאטש ס'שטימט נישט אויף פען און פאפיר, אא"וו. שמועסנדיג אזוי, פארציילט ער מיר אז ער איז יעצט פארנומען אנצופילן זיינע אלע קרעדיט קארטלעך צום מאקסימום, ווייל ער וויל זיי דערנאך קראכן. און ער פארענטפערט זיך פאר מיר, אז באמת איז עס נישט אזא גלייכע זאך, אבער וואס קען מען טון? מ'דארף דאך געלט צו חתונה מאכן...
פאר דעם וואס פרעגט צי 50% פונעם עולם איז ביכולת צו דעקן די איבריגע 50%: הונדערט פראצענט אז נישט. און ס'איז אגב דא מער ווי 50% מחותנים פאר וועמען מ'דארף צאמשטעלן. כ'בין שוין פארמישט געווען אין שאפן געלט פאר מער ווי איינעם; וויפיל קלערט איר קען מען צאמשטעלן? פינף טויזנט? צען טויזנט? מערסטנס פופצן-צוואנציג טויזנט, אין דער צייט וואס איין חתונה קאסט דריי מאל אזויפיל! און צוויי יאר שפעטער מאכט ער ווידעראמאל חתונה, גייט מען דען נאכאמאל צאמשטעלן אזויפיל געלט? די האר פון קאפ וועלן זיך אייך אויפשטעלן הערנדיג וויפיל פרומע, ערליכע מחותנים בא'גנב'ענען א האלבע שטאט, אריינגערעכנט געשעפטן וואס ווערן נישט באצאלט, הלוואות וואס ווערן נישט אפגעגעבן, און געקראכטע קרעדיט קארטלעך.
די תורה לאזט אוועקלייגן געלט, און די תורה הייסט אוועקלייגן געלט. אמת, נישט יעדער קען, און דער פראצענט וואס קען נישט איז טאקע פטור פון טון דאס השתדלות. און אויב האט ער געטון וואס ער האט צו טון, איז ער בארעכטיגט צו נעמען פון צדקה. אבער א גרויסער חלק קען יא. אן אייגענע קאר האסטו? טייערע וואקאציעס ערלויבסטו דיך? וואוינען אין איינער פון די טייערסטע געגנטן אין אמעריקע מיט א קינדער געבענטשטער משפחה קענסטו? מעגליך אז אויף געוויסע זאכן האסטו נישט קיין ברירה, אבער אסאך מענטשן וואלטן רואיג געקענט אראפציפן צוויי הונדערט דאלער א חודש. ווענדט זיך וואו מ'שטעלט די פריאריטעט. איך קען איינעם, א יונגערמאן מיט עטליכע קינדער, וועלכער פארט יעדעס יאר קיין אריזאנע, אבער האט נאכנישט אוועקגעלייגט קיין רויטן צענט אויף חתונה מאכן. מ'וועט שוין, ס'וועט שוין... דער אויבערשטער וועט שוין שיקן...
מאן דיהיב חיי יהיב מזוני. ביי "חיי" וועט קיינער נישט טראכטן אז אויב ער וועט אויסטרינקען א גלעזל בליטש וועט ער בלייבן געזונט; ביי מזוני קען מען אויך נישט לייגן דאס געלט על קרן הצבי און האבן בטחון אז ס'וועט ארויסוואקסן נייע אין חצר.
מיט אזויפיל ביכער, אויסגאבעס, גליונות, בראשורן, קאמפיינס, און ווירטואלע ארטיקלען, וואקסט דער אידישער ליטעראטור ווי אויף הייוון. וואס וועט זיין מיט א אידישן ספעל טשעקער?