רבי מאיר רוקח זצ״ל
מקאזלוב
דער רבי זצ"ל איז געווען א זוהן פון הרה"צ ר' משה רוקח זצ"ל אדמו"ר מקאזלוב, בן הרה"צ ר' מאיר זצ"ל, בן הרה"צ ר' אברהם יושע העשיל זצ"ל, בן הרה"ק רבי משה מקארוב זי"ע, בן הרה"ק השר שלום מבעלזא זי"ע,
ווי אויך האט דער רבי געצויגן זיין הערליכע יחוס צו די צדיקים הרה"ק רבי אשר מראפשיץ, בעל אוהב ישראל מאפטא, הדגל מחנה אפרים, הבעשטה"ק זי"ע, ר"ר מאיר מפרימשלאן זי"ע, רבי יואל משאץ זי"ע, רבי יוסף מיאמפאלא זי"ע, ר"ר מיכל'ע מזלאטשוב זי"ע און נאך.
אלס בחור האט דער רבי פלייסיג געלערנט אין ישיבה ערוגת הבושם ד'צעהלים וואס דאן האט דארט געדינט אלס ראש ישיבה הגה"ק בעל ברכות שמים מקאשוי זצ"ל, און שפעטער האט ער ממשיך געווען אין די ניי געגרינדעטע ישיבה אהל שמואל ד'קאשוי ווי דער רבי האט קונה געווען פון זיין גרויסן רבי'ן אסאך תורה און יר"ש און איז פארבליבן א נאנטע תלמיד אלע יארן, און שפעטער געשיקט עטליכע פון זיינע קינדער לערנען אין די קאשוי ישיבה, ווי אויך ביים לוי' פון זיין גרויסן רבי'ן אדר תשס"ה האט מען איהם מכבד געווען מכתיר צו זיין בנו הגדול הגה"ק בעל שיח חיים זי"ע אלס ממלא מקומו.
כשהגיע לפרקו איז דער רבי געווארן א איידעם ביי הגה"צ ר' שמחה בונם גרינבערגער זצ"ל ראב"ד פרעשבורג אין וואשינגטאן-הייטס, וואס ער איז אויך געווען א גרויסע יחסן ציענדיג זיין יחוס צו צדיקי בית גארליץ, צאנז, סיגוט, בעלזא, ליזענסק, אפטא, קאזניץ, קאסוב, וויזניץ, קאריץ, טשערנאביל און נאך.
נאך די פטירה פון זיין פאטער בשנת תשל"א לפ"ק האט ער איבערגענומען דאס ביהמ"ד וואס איז דאן געווען אין קראונהייטס, און בשנת תשל"ד האט ער זיך אריבערגעצויגן קיין בארא פארק ווי ער האט געעפענט דאס ביהמ"ד וועלכע איז געווען א לייכט-טורעם פאר די גאנצע אומגעגענט.
דער רבי זצ"ל האט מרביץ תורה געווען איבער דרייסיג יאר אין ישיבת חתן סופר אין ב"פ און עוסק געווען בתורה יומם ולילה מיט א זעלטענע התמדה, ווי אויך איז ער געווען א ווארימע בעל תפלה, און איבער אלעם איז אויף איהם געווען אויסגעגאסן א ענוות חן מיט א מורא'דיגע פשטות.
מיט יארן צוריק האט דער רבי אויפגעשטעלט מוסדות התורה פאר די פלטים וואס זענען ארויפגעקומען פון רוסלאנד, און האט אויך געדינט אלס רב פון שטאט 'טשערנאוויץ' אין אוקריינא ווי ער האט מקרב געווען אסאך יודישע נשמות לאביהם שבשמים.
דער רבי האט פארמאגט א ריזיגע אוצר הספרים מיט טויזענטע אלטע און אנטיק ספרים וואס ער האט געיארשענט פון זיין טאטע זצ"ל, ווי אויך האט ער געהאט אין זיין באזיץ די בעכער פון זקינו הרה"ק השר שלום זי"ע וואס ער האט באקומען בירושה.
במשך די לעצטע פאר יאר האט דער רבי געליטן פון פארשידענע מיחושים אבער ער איז ווייטער אנגעגאנגען מיט זיין עבוה"ק, די לעצטערע וואכן איז דער רבי גאר שוואך געווען און פארגאנגענעם מוצ"ש צו - שבת הגדול איז דער רבי נסתלק געווארן לשמי מרום אין עלטער פון 77 יאהר, לדאבון לב כל בית ישראל.
ביים לויה וואס איז פארגעקומען זונטאג אינדערפריה פארנט פון בית מדרשו האט מען מכתיר געווען דעם צווייטן זון הגה"צ ר' אברהם יהושע העשיל רוקח שליט"א אלס אדמו"ר מקאזלוב אין וויליאמסבורג, און די זון הרה"צ ר' מרדכי רוקח שליט"א אלס אדמו"ר מקאזלוב אין בארא פארק.
דער רבי זצ"ל איז געקומען לקבורה אויפן קאזלוב'ע חלקה אין ביה"ח 'בית דוד' אין לאנג איילענד נעבן ציון קדשו פון זיין פאטער הגה"ק ר' משה רוקח זצ"ל אדמו"ר מקאזלוב.
דער רבי זצ"ל האט איבערגעלאזט א שיינעם דור פון בנין וחתנין רבנן:
בניו:
הרה"צ רבי שמואל שלום שליט"א אב"ד קארוב, חתן הגה"צ אב"ד וואוידיסלאוו זצ"ל,
הרה"צ רבי אברהם י-הושע העשיל שליט"א אדמו"ר מקאזלוב וומס"ב, חתן הגה"צ אב"ד סוליצא וויליאמסבורג זצ"ל,
הרה"צ רבי יואל שליט"א אב"ד אהל משה קאזלוב מאנסי, חתן הגה"צ אב"ד טערצאל שליט"א,
הרה"צ רבי משה שליט"א, חתן הגה"צ רבי יחזקאל דייטש שליט"א אב"ד מקור חיים מאנסי,
הרה"צ רבי שמחה בונם שליט"א, חתן הגה"צ אב"ד דברי אמונה מאנסי שליט"א,
הרה"צ רבי מרדכי שליט"א אדמו"ר מקאזלוב-ב"פ, חתן כ"ק אדמו"ר מקאליש זצ"ל,
הרה"צ רבי יוסף אלטר שליט"א, חתן הגה"צ אב"ד נירבאטור שליט"א,
הרה"צ רבי לייבוש שליט"א חתן כ"ק אדמו"ר מסטראזניץ שליט"א.
חתניו:
הרב יוסף מייזליש שליט"א בן הגה"צ אב"ד סאטמאר ב.פ. שליט"א,
הרב שרגא פייבל איגר שליט"א חתן הרב עזריאל מאיר איגר שליט"א בן כ"ק אדמו"ר מלובלין זצ"ל.
זכותו יגן עלינו ועל כל ישראל אמן.