סטראפקאוו האט געשריבן:ווייסעך דען האט געשריבן:ביטע זייט מהנה אנדערע אידן מיט די רעסעפי פון די קארן פלעקס קיגעל ווילמיר עס פרובירן לכבוד שבת
אויפן בקשה פון געוויסע דא אויפן וועלטעל, טיילן מיר דא מיט דעם געשמאקן רעצפעט פונעם באקאנטן אייגענארטיגן קארען פלעקס קיגל, וועלכער די רביים לבית קיוויאשד טיילן בקידושא רבא יעדן שבת אינדערפרי נאכן דאווענען.
אין דעם געלעגנהייט ווילן מיר אויסדריקן א ספעציעלן דאנק פאר די רעבעצין תליט"א פארן לאזן אריינבליקן אינעם אזוי באליבטן רעסעפי בוק צו קענען מיטיילן מיטן הינגעריגן ציבור די רעצפעט.
יעדער שרייט הויעך ש'כח
איז רבותי, מען איז גרייט ?
צום אלעם ערשט יעדער ארויס פון קיך, די קיך גייט אקוראשט פארוואנדעלט ווערן אין א מלחמה זאנע ווי ס'גייען פליען אביעקטן, זיך גיסן וואסער, אויל, צוקראכטע אייער וכו' וכו'.
פארוואס ?
אה, כ'האב דיר דאך געווארענט אז דאס איז אן אייגענארטיגער קיגל !!
די קיגל האט געוויסע אייגענארטיקייטן וואס אנדערע קיגלן און אלגעמיין פארמאגן נישט, אריינגערעכענט דאס אז דער געשמאקער קארען פלעקס קיגל ווערט געמישט און געקאכט דורך טאטי אליין !!!
אה, יעצט פארשטייסטו שוין פארוואס מען ברויך אפיאגן פון קיך באצייטענס ?
נעקסט טיים פרעג נישט קיין קשיות, אויב מען זאגט ארויס פון קיך, דאן אויב ווייסטו וואס גוט פאר דיין עקסיסטענץ יאפאץ אפ פון דאנעט באצייטענס.
איז יאלא, דער גאנצער קיך אין די אומגעגנט איז אויסגעלערט, די מלוכה איז אונזערס פאר א קורצע וויילע, שארץ ענק ארויף די ארבעל, מען זאגט לכבוד שב"ק און היידא, ביז אפאר מינוט העט זיך קאכן א געשמאקער קעגעל.
צום ערשט נעם א שאכטל..... נא וואס, לאמיר זעהן אויב איר קענט צו טרעפן, א שאכטל וואס ?......
א שאכטל קארען פלעקס !!!!
נו וואס דען האסטו געקלערט ? רייס קריספיס ? ס'איז דאך א קארן פלעקס קיגל, נישט אזוי ?
אקעי, נעם א שאכטל, ליידיג אויס האלב פונעם אינהאלט דערפון אריין אין א שיסל.
נאכער גיס אריין אין א צווייטע שיסל ווי פאלגענד.
א חצי לוג שמן ( 1/2 Cup)
קלאפ אויף דריי אייער, מאך זיכער ס'האט נישט קיין בלוטצטראפ.
גיס צו א גאנץ גלעזל הייס וואסער
אביסקעלע מלח
א שמינית פון א קליין לעפעלע (1/8 tsp) באק פאודער ( baking powder )
איין גרויסער לעפל (1 tbl spoon) צוקער
מישט אלעס אויס דערנאך מישט אריין די קארען פלעקס גופא, מישט דאס גוט אויס גענוי ווי א קוגעל, דערנאך לייגטס עס אריין אין א דאבעל בוילער אין מען לאזט דאס קאכן אויף א קלענערע פלאם ביז עס באקומט א שטיקעלע קראסט, דאס הייסט עס הייבט אן ווערן אביסקעלע טריקען פון אויבן, דאן איז דאס גרייט צו טועם זיין אויף טועמי'.
מפני חוסר מקום אויפן שבת בלעך ווערט דאס ביינונז אין שטוב ארויסגענומען נאכן גוט אפקאכן פונעם דאבעל בוילער און ווערט פלאצירט על גבי הטשולענט טאפ איבערנאכט.
מען קען טון די זעלבע רעצפעט אן די דאבעל בוילער, און אנשטאט דעם דאס אריינלייגען און א קליינע בעקעלע און באקן אויף 350 גראד פאר ארום א האלבע שטונדע-פערציג מינוט, ביז ס'זעהט זיך אן כקרום על פני', אבער מען זאל נישט קומען מיט קיין טענות אז ס'איז נישט עפעס ווייסעך וואס, ווייל דאס קומט אויסדריקליך געקאכט אין א דאבעל בוילער.
האטס מיר אן עונג שבת.
ויאכלו ענוים וישבעו!