אויפן פארשלאג פון די חשוב'ע חברים עפן איך אויף א שטיבל לכבודו דא במדור 'ועל פליטת בית סופריהם'. מנהלים, ביטע שלעפט אריין אהער די תגובות פונעם צענטראלן 'ברוך דיין האמת' אשכול.
nmi האט געשריבן:בד"ה ר' בערל שווארטץ דער שרייבער
בד"ה!
רבי דוב בער ב"ר משה דוד יהודה שווארץ ע"ה איז געווען אן אייגנארטיגער פארצייטישער בעה"ב. א חסידישער איד און א תלמוד חכם; דאס "אמאליגקייט" און פארצייטישע חן איז געווען אויסגעגאסן אויף זיין גאנצע באנעמונג. ער האט עוסק געווען אין חוקר זיין די היסטאריע פון רבנים וקהילות. מיט יארן צוריק פלעגט ער לויפן א קאלום אין 'די צייטונג' ווי ער פלעגט צווישן אנדערע באשרייבן און ציטירן פון אמאליגע פנקסי הקהילות.
ער האט ארויסגעגעבן פארשידענע חיבורים:
ארצות החיים - שם הגדולים לגדולי ארצות הברית
משיב דברים, ב' חלקים - מכתבים און אפהאנדלונגען, מיינסטענס איבער עניני השקפה, אידישע היסטאריע והמסתעף
זמירות ישראל - די היסטאריע פון אידישע נגינה וחזנות
אמרי דבש - פתגמין, שיחות, מנהגים, וסיפורי צדיקים
רבי בערל האט געהאט א באבע, א פארצייטישע אידענע פון קליינווארדיין, מרת אסתר בלאזנשטיין. ער האט מיר דערציילט אז אלץ בחור פלעגט זי אים ארומשיקן מיט פארשידענע פריוואטע שליחות ופעולות לטובת הדת. איין יאר בעפאר די ימים נוראים האט זי אים געשיקט מיט פערזענליכע מכתבים אדרעסירט צו 3 גדולי ישראל; רביה"ק מסאטמאר זצ"ל, אב"ד קראסנא זצ"ל, (דער דריטע רב געדענק איך נישט). אינעם בריוו האט זי זיך מתמרמר געווען אויפן מצב הצניעות אין די עזרת נשים, און זי האט געבעטן די רבנים אז זיי זאלן מעורר זיין איבער דעם ענין ביי זייערע דרשות. שפעטער האט זי צוריקגעקערט אז דער קראסנא רב האט טאקע געזאגט ביי זיין דרשת שבת שובה אז א אידענע האט אים מעורר געווען אז די צניעות ברויך א תיקון. פארשטייט זיך אז זי האט זיך מחי' געווען... און עס האט איר געגעבן חיזוק אויף ווייטערדיגע פעולות.
יהא זכרו ברוך.