Haklal האט געשריבן:א צדיק פין א יוד געווען, אויסגעזאגט תהילים יעדן טאג, איך האב מיך איינמאל מזכיר געווען ביי אים כידוע האט א גבאי צדקה א גרויסן כח, האט ער גענומען מיין נאמען אין מיך אינזין געהאט טעגליך.
איך ווייס אז ער האט געבארגט געלט פאר מענטשן וואס האבן זיך געמוטשעט פאר פרנסה כאטש ער איז געווען ווייט פין א גביר.
ער האט נישט גענומען געלט פארן גיין נאך געלט טעגליך, ער האט געזאגט מען וועט עם שוין באצאלן נאך די 120.
אין וויפיל יודן ער האט מהנה געווען טעגליך מיט זיין שמייכל.
והלך לפניך צדקיך
יהא זכרו ברוך
איך בין נאך אלץ אין שאק פון די פריצייטיגע פטירה פון ידידי וידיד כל בית ישראל הרה"ח רבי ברוך יהודה שניטצלער ז"ל. ווייניג מענטשען זענען דא וואס ס'פילט זיך א אמת'ן חלל ווען זיי זענען נישט דא. דער צדיק וואס האט געהאט אזוי פיל צדקות אין זיך האט פארקערפערט די בעסטע אין כלל ישראל. ווער קען פארגעסען זיין שמייכעל, זיין פריינטליכקייט, זיין לויטערע נשמה וואס אנדערע האבען עס שוין געזאגט אז עס האט ארויס געשטראלט פון זיינע לעכטיגע אויגען. כ'האב נאך זוכה געווען צו געבען אים א דאלער א צוויי טעג פריער, און ווי געווענליך מיר ווארעם אנגעווינטשען, אבער האלטענדיג אין מיטען דאווענען (דארט ווי מען מעג וויכטיגס אויס רעדען) האב איך אים צוריק געווינטשען קורץ מיטען המברך יתברך.
איך וויל נאר צולייגען צו די אלע מעלות וואס מען האט שוין ארויס געברענגט, די געוואלדיגע מעלה וואס ער האט געהאט אין זיין זייער פארזיכטיג שלא לבייש את מי שאין לו. ער האט געווינטשען ווען מען האט אים געגעבען און אויך ווען מען האט אים נישט געגעבען, און נישט געמאכט קיין חילוק וויפיל מען האט אים געגעבען. אבער נאך א גרעסערע צדקות האט ער געהאט אז ער האט מוותר געווען אויף גוט געלט און אויס געלאזט מענטשען אויב איינער וועט ווערען מבוייש אז ער האט נישט וואס צו געבען. דעם וואס ער האט געוויסט קען אים נישט געבען האט ער פראבירט אויס מיידען, און אויב נישט געהאט א ברירה האט ער אים אזוי הארציג אנגעווינטשען אז די ארומיגע האבען זיכער געמיינט אז ער האט אים געגעבען א הונדערטער.
ער וועט אונז אלע אויס פעלען; א וואך אן רבי ברוך יהודה אין שוהל וועלען מיר אלע שטארק מיסען.
יהי זכרו ברוך