מיר קומען מיט די פאר שורות אייך מעלדן א גוטע בשורה, יא! אייוועלט קערט זיך צוריק צו איר ארגינאלע גלאנץ!!!
מ'וועט נישט דארפן אפשטויבן און זיך בענקן צו אלטע אשכולות. מיר האבן די שרייבערס, מיר האבן די מגיבים און מיר האבן די כוחות, און מיר וועלן דאס ערפאלגרייך דערגרייכן: מה שהי' הוא שיהי'.
ולעניננו
היות דאס וועלטל האט זיך פי כמה פארברייטערט, עס קומען צו צענדליגער מאל מער תגובות א וואך ווי עטליכע יאר צוריק. מען דארף האלטן א וואכזאם אויג אלע שעות פון טאג, און מיר נויטיגן זיך אין פרישע כוחות.
זענען מיר געזעסן און דן געווען שוין עטליכע וואכן וועמען מ'זאל אויפנעמען אלס אחראים. מיר האבן געשטעלט אן אנקעטע ברבים, און אויך זיך פארבינדן מיט עטליכע ניקים. ביז דער באשעפער האט אונז געהאלפן און מיר האלטן שוין דא, און מיר מעלדן אייך איבער די אויפנאמע פון פיר נייע אחראים. ואלה שמותם (לפי סדר הא"ב):
- אור אייניקל
ארחיקה נדד
כתוב וחתום
קאפעלע
די פיר דערמאנטע חשוב'ע מיטגלידער זענען וואויל באקאנט מיט זייער הערליכע רעפוטאציע צווישן די ווענט פון אונזער וועלטל, און מיר שטאלצירן אז זיי זאלן באקומען דעם כבוד - הגם לא שררה אני נותן לכם - צו באקרוינט ווערן אלס די נייע אחראים פון אונזער הייליג ווינקל אויפ'ן ברויזנדן אינטערנעט.
בנוסף צו די אויפנאמע האט אונזער געטרייער באנוצער הרב 'קלאצקאפ' וואס האט שוין צוגעגעבן אזויפיל צו אונזער וועלטל, און געווען עטליכע יאר אן אחראי און ארויסגעהאלפן פון הינטער די קוליסן, ווערט איצט פראקלאמירט אלס אן אפענער אחראי למזל טוב.
[align=center]* * *[/align]
גלייכצייטיג - בחדא מחתא קומען מיר צו אייך מיט א נייע גלאררייכע פלאן, נעמליך מיר ווילן אויפנעמען נאך איבער צען טויזענט אחראים.
רבותי מיר פראקלאמירן א 'סעלף אחראי' אקציע!!!
מיר דארפן נישט און מיר ווילן נישט מאריך זיין אין די מציאות וואס גייט פאר, די אחראים און מנהלים זענען פארנומען אלע שעות ארום דעם זייגער קעיר צו נעמען פונ'ם וועלטל.
ווען וועלט וואלט געווען וועלט, וואלט מען געווען פארנומען מיט פארבעסערן און פארשענערן דאס וועלטל לאין שיעור ואין ערך, ולדאבונינו איז מען פארנומען מיט מעקן דא און דארט כו' וכו'.
דער עיקר פראבלעם איז, אז באנוצערס / מעמבער / ניקס נוצן - ליידער - אויס אונזער רייכע וועלטל אויף זיך שטעכן איינער דעם אנדערן בדיבור ובכתיבה, אדער זיך צו צייגן שענער בעסער און קלוגער פונ'ם צווייטן.
רבותי, לא עת לחשות, פון היינט און ווייטער איז אייוועלט א "פליקען פרייע זאנע" און מיר שטעלן אויף דעם 12 טויזענט+ באהאלטענע אחראים, יעדער זאל האבן אחריות נישט אריינצופליקן דעם חבר, נישט ווען יענעם גייט גוט, און אוודאי ווען חלילה נישט.
לאמיר נישט פארגעסן, מיר זענען אלע דא כאיש אחד בלב אחד, אויסצונוצן דעם פלאץ פאר א גוט ווארט און א געשמאקע פארברענג.
- האט אייך יענער נישט פונקטליך פארשטאנען? צו וואס יענעם אריינגעבן.
האט יענער א גוטע נייעס פון זיין חסידות? פארגין עס אים.
האט יענער געזאגט א ווארט וואס שמעקט אייך נישט? ער האט עס מסתמא נישט געמיינט.
יענער האט אייך יא אריינגעפליקט פערזענליך? זייט עס מדווח, אבער ענטפערט אים נישט ברבים אדער ביחיד.
די ליסט גייט אן ווייטער, יעדער זאל אריינפילן די בלענקס.
געדענקט מיר נעמען 'אייך' אויף, און איר זענט פון היינט אן אחראי אויף די שענסטע אידישע ווינקל אויף אונזער פלאנעט.
לאמיר מקרב זיין ביאת המשיח מיט'ן זיך פארגינען איינער דעם צווייטן, לאמיר זיך מקבל זיין פון היינט און ווייטער זענען מיר אויף די "פליקען פרייע זאנע" טיעם.
ובזכות זה ירא ה' בעניי עמו, ויגאלנו גאולת עולם במהרה דידן אמן.
[align=center]* * *[/align]
אין א זייטיגע נאטיץ, מיר האבן אנגענומען א זעראו טעלעראנץ אויף זיך פריוואט פליקן, נישט קיין חילוק די סיבה אדער פארום. די וואס וועלן עובר זיין דערויף, (נישט קיין חילוק ווער ס'האט אנגעהויבן), וועט קענען זוכה זיין צו א חסימה עולמית.
